CEBU, Philippines -  Usa ka driver sa traysikad kinsa nanungog sa iyang gikulata , nalubaan og icepick   didto sa sitio Baybay 1, barangay Poblacion syudad sa Toledo sa miaging buntag.

Ang biktima nailhan nga si Crisencio Gako, nga taga barangay Tubod sa maong syudad samtang ang suspetsado usa ka bayong-bayong nga nagpangidaron og 17 anyos ,   nga taga barangay Bato sa maong syudad.

Sumala sa kapolisan nga ang biktima naghatud kang PO1 Dennis Muñoz nga iyang pasahero ngadto sa pantalan sa dakbayan gikan sa bus terminal.

Dihang naabot na ang biktima sa pantalan kalit lang mihamag kaniya ang suspetsado ug sa walay daghang pangutana gihansakan siya sa makadaghan sa icepick niini. Si P01 Muñoz nga nakasaksi sa hitabo misikop dayon sa suspetsado ug gi-indurso kini ngadto sa kapolisan sa syudad sa Toledo.

Samtang ang biktima gidali usab paghatod ngadto sa Toledo City District Hospital apan gibalhin kini sa usa sa mga tambalanan ning dakbayan sa Sugbo. Sa pakighinabi sa Banat News ni SPO1 Gil Lastimosa nasayran nga ang biktima nakaangkon og tulo ka samad sa iyang walang bukton ug usa usab sa pikas nga bukton ug laing usa sa walang bahin sa iyang buko-buko.

Matud pa ni Lastimosa nga sa wala pa mahitabo ang pagpanunggab, ang suspetsado gikatahong gikulata sa biktima ug gani giingong gisungog-sungog pa kini hinungdan nga hilabihan ang kalagot nga gibati sa maong bayong-bayong, busa nanimawos ngadto sa biktima.(WC) (BANAT NEWS)